Onlayn veb-sayt qurucusu "Wix", interaktiv lövhə "Miro" və onlayn əməkdaşlıq platforması "Coda" 12 sentyabr tarixindən etibarən Rusiyada fəaliyyətlərini dayandırıb.
Oxu.Az-ın məlumatına görə, bu barədə şirkətlərin veb-saytlarında məlumat verilib.
Son iki xidmət həmçinin Belarusdan da çıxıb. "Wix" qeyd edib ki, hesab bloklandıqdan sonra istifadəçiyə məxsus heç bir sayt dərc olunmayacaq və baxış üçün əlçatmaz olacaq.
"Miro"da bildirilib ki, şirkət Avropa İttifaqı və Amerika Birləşmiş Ştatlarının bütün normativ aktlarına, o cümlədən sanksiyalara və digər ticarət normalarına riayət etməlidir.
Onlayn birgə iş üçün məkanı olan "Coda" da sanksiyalara riayət etmək məqsədilə fəaliyyətini dayandıracağını bildirib.
Həmçinin məlum olub ki, marketinq üçün proqram təminatı tərtibatçısı "Hubspot" və tapşırıq idarəetmə platforması "ClickUp" Rusiya ərazisində öz xidmətlərinə girişi bloklayacaq.
