“Gözlənildiyi kimi OPEC+ gündəlik hasilatın 1 milyon barrel artırılması ilə bağlı qərar qəbul etdi. Əslində, ABŞ Prezidentinin hasilatın artırılmasının vacibliyi haqqında 2 twitindən sonra OPEC-in və xüsusən də Səudiyyə Ərəbistanın bazara daha çox neft çıxarmağa müsbət yanaşağı proqnozlaşdırılan idi”.
BAKU.WS xəbər verir ki, bu barədə tanınmış iqtisadçı ekspert Vüqar Bayramlı məlumat verib. Onun sözlərinə görə, sözügedən qərarın açıqlandığı gün dünya bazarında neftin qiyməti 4 faizə yaxın yüksəldi.
“Əslində bu qiymət artımları heç də birbaşa hasilatın arıtırılması haqqında qərar ilə bağlı deyil. Belə ki, elə həmin gün elan edilən statistikaya əsasən ABŞ-da neft quyularının sayı 7 ədəd azalıb və bu da birbaşa qiymətə təsir göstərdi”, - deyə ekspert bildirib.
OPEC-in son qərarı neftin qiymətinə necə təsir göstərəcək?
Vüqar Bayramov deyir ki, hasilatın gündəlik 1 milyon barel artırılması heç də neftin qiymətlərinin qısa zamanda kəskin azalmasına səbəb olmayacaq:
“Hasilatdakı artım qərarına baxmayaraq yenə də qlobal bazarda tələb üstünlüyü var. Digər tərəfdən, hasilatın artırlması ilə bağlı qərara baxmayaraq OPEC və bu quruma üzv olmayan amma qərarı dəstəkləyən dövlətlərin qısa zamanda hasilatı qeyd edilən səviyyəyə çatdırmaq imkanları yoxdur”.
Ekspert deyir ki, Rusiya ən yaxşı halda yaxın 3 ayda hasilatı maksimum 300 min barrel artıra bilər:
“Bütövlükdə, OPEC+ hasilatın artırılması bağlı qərarına ən yaxşı halda yaxın yarım ildə nail ola biləcək. Bu isə o deməkdir ki, hələlik bazarda təklifin artıqlığı müşahidə edilməyəcək. Son qərar sadəcə neftin dünya bazar qiymətində kəskin artımların qarşısını almaq məqsədi daşıyır”.
Vüqar Bayramov hələlik heç bir beynəlxalq qiymətləndirici şirkət neftin qiymətində kəksin azalma proqnozlaşdırmadığını bildirib:
“Bu isə o deməkdir ki, əgər hasilatın artırılması ilə bağlı daha bir qərar olarsa o zaman neft yenidən əvvəlki bazar qiymətinə, bir barel üçün 60 dollarlıq həddə enə bilər. Bütövlükdə, OPEC və onunla anlaşan digər bir sıra neft ölkələrini Ağ Evin tövsiyyəsinə uyğun olaraq hasilatı artırması neftin qiymətinin siyasiləşdiyindən də xəbər verir. Bu isə o deməkdir ki, neft bazarında hər zaman sürprizlər ola bilər.
Ziya SƏCCAD
