Belə hesab olunur ki, dünyada yaşayan insanların 50%-ndə yastıpəncəlik var.Qadınlarda yastıpəncəliyə kişilərlə müqayisədə daha tez-tez təsadüf edilir.
Yastıpəncəlik tək kosmetik qüsur deyil. Yastıpəncəlik müxtəlif və bəzən çox ağır fəsadların inkişafına səbəb ola bilər:
- pəncənin, böyük barmaqların deformasiyası (əyilməsi), qabarlar
- ayaqlarda ağrılar, ödemlər
- bud və diz oynaqları xəstəlikləri
- onurğanın deformasiyası, skolioz, osteoxondroz, fəqərə arası yırtıqlar
- radikulit
- varikoz xəstəliyi və s.
Yastıpəncəliyi olan insan uzun müddət ərzində ayaq üstə dayana bilmir, onun ayaqları tez yorulur, əmək qabiliyyəti azalır.
Böyüklərdə yastıpəncəliyi tam müalicə etmək mümkün olmasa da bəzi tədbirlərin köməyi ilə yastıpəncəliyin fəsadlarını (ayaqlarda ağrılar, yorğunluq, oynaqlar problemləri və s.) aradan qaldırmaq və ya azaltmaq mümkündür. Bu məqsədlə xüsusi bədən tərbiyəsi, fizioterapiya, massaj, xüsusi supinatorların (ayaqqabıların içinə qoyulan xüsusi altlıq) istifadəsi və s. tədbirlər istifadə olunur.
Saglamolun.az bildirir ki, özünüzdə yastıpəncəliyin olub-olmadığını təyin etmək istəyirsinizsə, bu testdən istifadə edin.
Pəncələrinizin alt hissəsinə hər hansı boya, yağlı krem və s. çəkin və ayağınızı ağ vərəqin üzərinə qoyun. Siz ayaq üstə, sizin üçün təbii olan vəziyətdə dayanmalısınız. Pəncənin izini aldıqdan sonra vərəqdə parallel və perpendikulyar xətləri çəkin (şəkildə göstərildiyi kimi).
Daha sonra pəncənizin izini şəkillə müqayisə edin.
Bu testin köməyi ilə böyüklərdə yastıpəncəliyin ilkin diaqnozunu qoymaq mümkündür. Lakin diaqnozu dəqiqləşdirmək üçün ortopedə müraciət etmək və bəzi xüsusi müayinələrdən keçmək lazımdır.
Nəzərinizə çatdıraq ki, bu test uşaqlarda istifadə olunmur.
