Baş ağrılarının 300-dən çox səbəbi ola bilər.
Bunu tanınmış həkim, anestezioloq-reanimatoloq Şahin Məmmədov baş ağrılarının yaranma səbəblərindən danışarkən deyib.
Həkimin sözlərinə görə, səbəbləri araşdırmağa başlayarkən əvvəlcə 3 ən böyük səbəbi inkar etmək lazımdır:
1. Susuzluq. Ya lazımi miqdarda su içməmisiniz, ya da suyu bədəndən çıxara bilən dərman və ya qida qəbul etmisiniz.
2. Yuxusuzluq. Yorğunluq+lazımi miqdarda yuxunun olmaması baş ağrısı səbəbləri arasında 2-ci yerdədir.
3. Bəzi qidaların qəbulu. Bunlardan bir neçəsi:
* Çay sodası və ya ya duzlu yemək, hipernatremiya verərək başağrısı yaradır.
* Aspartam. Bu süni şirinləşdirici bir çox içkilərə, məsələn kola və bəzi qidalara qatılır. Sutkalıq miqdarı 50 qramdan artıq olanda başağrısı verir.
* Banan və avokado. Bu meyvələrdə tiraminin miqdarı çoxdur. Əgər MAO inhibitor-antidepressant qəbul edirsinizsə və ya MAO defisitli insansınızsa, bu meyvələr xüsusilə başağrı verəcək.
* Çörək. Tərkibində bol miqdarda qluten olan çörək, həssas insanlarda başağarı yaradır. Seliak xəstəliyinin bəzən yeganə əlaməti olan başağrı ola bilər.
* Partilərdə, toylarda yeyilən zeytun turşusu, pendir assortisi və çərəz. Bu qidalar uzun müddət saxlanıldıqda tərkibində tiraminin miqdarı çoxalır.
* Saqqız. Tərkibində mentol olan saqqızdan çox istifadə edən insanlarda həm mentola, həm də çənə yorğunluğuna görə başağrı ola bilər.
* Pendir, qırmızı çaxır. Uzun müddət saxlandıqda dadı yaxşılaşır, amma tiraminin miqdarı artır. Tiramin amin turşusudur. Yuxarıda da qeyd etdiyimiz kimi, bəzi insanlarda bu ferment çatışmır.
* Kolbasa və sosiska. Tərkibindəki nitratlar baş-beyin damarlarını genişləndirməklə başağrı yaradır.
* Şokolad. Tərkibində tiramin, feniletilamin, kofein var və bu kombinasiya bəzi insanlara başağrı verə bilir.
* Qidalanmasanız da başınız aclıqdan ağrıyacaq. Səbəb isə aydındır: hipoqlikemiya.(publika)
